გაზეთი
"საქართველოს რესპუბლიკა" გთავაზობთ ინტერვიუს პარტია „სოლიდარობა მშვიდობისთვის“ საერთაშორისო მდივანთან, ბატონ
მამუკა ფიფიასთან, რომელიც ბოლო დროს საინტერესო ინიციატივებით გამოდის ქართულ-რუსულ ურთიერთობებთან დაკავშირებით. ეს საინტერესო თაოსნობები როგორც ქართულ, ისე საერთაშორისო მედიის ყურადღებას იპყრობს. თავის მხრივ, ე.წ. „პროდასავლური“ საინფორმაცო სააგენტოები ცდილობენ მისი საქმიანობის დისკრედიტაციას. მოგეხსენებათ, პოლიტიკური დისკუსიები და ინტრიგები საზოგადოებაში ინტერესს იწვევს იმ პროცესების მიმართ, რომლებიც პარტიის გარშემო ხდება და ამიტომ გადავწყვიტეთ
„სოლიდარობა მშვიდობისათვის“ ლიდერს ინტერვიუს სახით გავსაუბრებოდით.
- ბატონო მამუკა, თქვენ იყავით ერთ-ერთი ინიციატორი, როცა ჯერ კიდევ 7 მაისს გაიმართა კონფერენცია რუსეთთან დიალოგის თაობაზე და შემდეგ დაიწყეთ ხელმოწერების შეგროვება. საინტერესოა, რით დასრულდება ეს პროცესი?- უპირველეს ყოვლისა, გმადლობთ, რომ დაინტერესდით ამ აქტუალური საკითხით. დიახ, ამ კონფერენციაზე დაესწრო ქართული საზოგადოების მნიშვნელოვანი ნაწილი, 30-ზე მეტი პოლიტიკური პარტიის წარმომადგენლები და საზოგადოებრივი ორგანიზაციები. ჩვენ დავაარსეთ ზეპარტიული გაერთიანება „თავისუფალი ტრიბუნა“ და მივიღეთ რეზოლუცია რუსეთთან დიალოგის მოწოდებით დაგვეწყო ხელმოწერების შეგროვება, რაც ძალიან წარმატებით მიმდინარეობს დღესაც. ქართულ-რუსული დიალოგი ორი ქვეყნის ინტერესებშია და საქართველოს მოსახლეობის მხრიდან დიდ აქტივობას ვხედავთ, ძალიან ბევრი ადამიანია დიალოგის მომხრე. უბრალო ხალხი, მშვიდობიანი მოქალაქეები რეგიონებში თავად აგროვებენ ხელმოწერებს და გვიგზავნიან. ასევე, ელექტრონულად მიმდინარეობდა ხელმოწერები და მიუხედავად იმისა, რომ საიტი მანიფესტ.გე არაკეთილმოსურნეებმა ამ დროის განმავლობაში თითქმის ერთი თვე გათიშეს, რომ ჩვენთვის ხელი შეეშალათ, დღეისათვის 83 000-მდე ხელმოწერა დადასტურდა! ეს უპრეცედენტო ფაქტია, ამდენი ხელმოწერა ჯერ არავის შეუგროვებია საქართველოში ელექტრონულად! ამის გარდა შევაგროვეთ ხელმოწერა ბლანკებზე და საერთო რაოდენობა 140 000-მდეა. ჩვენ ასევე, სტუდიაშიც ჩავატარეთ ინტერაქტიული გამოკითხვა და ზარების 92%-მა დადებითად შეაფასა ჩვენი ინიციატივა.
მოკლედ,
ქართველი ხალხის ერთსულოვანი ნებაა, დაიწყოს დიალოგი და ჩვენ უახლოეს ხანებში გავაკეთებთ ოფიციალურ განცხადებას, მივმართავთ საქართველოს მთავრობას, რომ დიალოგი აუცილებელია და მათ აქვთ ხალხის მხარდაჭერა ამ პროცესის დასაწყებად!
- ბატონო მამუკა, არიან ე.წ. „პროდასავლური“ ორგანიზაციები და მედიები, რომლებიც ცდილობენ, ხელი შეუშალონ რუსეთთან დიპლომატიური ურთიერთობების დარეგულირების პროცესს. ზუსტად ისინი ავრცელებენ ინფორმაციას, რომ თქვენ „გეორგიევსკის ტრაქტატი 2“-ის გაფორმების ინიციატივით გამოდიხართ. იქნებ განგვიმარტოთ, ეს რას ნიშნავს...- ეს წმინდა წყლის პროვოკაციაა, ჩემი და ზოგადად ჩვენი თანამოაზრეების დისკრედიტაციის მცდელობაა, რაც მას შემდეგ დაიწყო, როდესაც დიალოგის მოწოდებით ხელმოწერების შეგროვება აქტიურად დავიწყეთ, ეს მოსალოდნელიც იყო და ჩვენ ამისთვის მზად ვიყავით. ორ ქვეყანას შორის ფიგურალურად უნდა შედგეს დიალოგი და მათ შორის მოვიხმე სიტყვები „ახალი გეორგიევსკი“, რასაც წმინდა სიმბოლური დატვირთვა აქვს და მიუთითებს ისტორიული პარალელის მოხმობას და ორ ქვეყანას შორის კეთილმეზობლური ურთიერთობის ახალი ეტაპის დაწყებას. მაგრამ, როდესაც ხელმოწერების შეგროვება დავიწყეთ და წარმატებით მთავრდება ჩვენი ინიციატივა, ერთ-ერთ ტელეარხზე კიდევ ერთხელ გამოვიყენე სიტყვები „გეორგიევსკის ტრაქტატი“ და სწორედ ამას მოყვა მათი აბსურდული ბრალდებები.
დღეს ისე არ უჭირს საქართველოს, როგორც ეს იყო მე-18 საუკუნეში, იმ დროისთვის მართლაც სწორი გადაწყვეტილება მიიღო მეფე ერეკლე მეორემ, რამაც ქართველი ხალხი გადაარჩინა ფიზიკური განადგურებისგან, დაქუცმაცებისგან და სულაც გამუსულმანებისგან. ახლა კი სხვა ვითარებაა, დღეს საქართველოს და რუსეთს ერთმანეთი სჭირდებათ და როცა დაიწყება დიალოგი, მოლაპარაკებები წარიმართება ორ სუვერენულ დამოუკიდებელ სახელმწიფოს შორის, აბსოლუტურად თანაბარი პირობებით. მე ეს ზუსტად ვიცი, რადგან კარგად ვიცნობ რუსეთში არსებულ პოლიტიკურ ელიტას და ვიცი მათი აზრი და შეხედულებები ამ საკითხთან დაკავშირებით.
- ბატონო მამუკა ასევე ერთობ საინტერესოა თქვენი და სათათბიროს დსთ-ს და ევრაზიული ინტეგრაციის კომიტეტის თავმჯდომარის ლეონიდ კალაშნიკოვის ერთობლივი ინტერვიუ გაზეთ „ასავალ-დასავალში“. აქაც ისმის კრიტიკა თქვენი მისამართით, კონკრეტულ საკითხებზე: „ხელშეკრულების გაფორმება რუსეთთან“ და „კონსტიტუციიდან 78-მუხლის ამოღება“.- კრიტიკა ყველას მხრიდან მოსალოდნელია, როცა ერთგულად ემსახურები ქვეყნის ეროვნულ ინტერესებს და პოლიტიკაში ხარ, თუმცა ის, რაც მე და ზოგადად ჩვენს პარტიას გაუკეთებია ბოლო წლების განმავლობაში, გაუგებარია ოპონენტების გაუაზრებელი კრიტიკა. მაგალითად, ჩვენ ვთხოვეთ რუსეთის პრეზიდენტს ვლადიმერ პუტინს, რომ აღდგენილიყო პირდაპირი ფრენები, მოხსნილიყო სავიზო რეჟიმი, საქართველოს მოქალაქეებს ჰქონოდათ რუსეთში ლეგალურად მუშაობის უფლება და... ეს ყველაფერი დაკმაყოფილებულ იქნა. ასევე, რამდენჯერაც თხოვნით მივმართეთ რუსულ მხარეს ჩვენი მოქალაქეების გასათავისუფლებლად, ვისაც ელოდა პატიმრობა, ჩვენი ჩარევის შემდეგ ისინი გაათავისუფლეს.
დასავლეთის აგენტურისთვის ეს ყველაფერი რასაკვირველია მიუღებელია, თუმცა, ქართველი ხალხისთვის დადებითი მოვლენაა. რაც შეეხება ჩემი და
ლეონიდ კალაშნიკოვის ერთობლივ ინტერვიუს, ძალიან საინტერესო განცხადებები იყო, მაგალითად, მე ხაზგასმით აღვნიშნე, რომ ქართულ-რუსული მოლაპარაკებების დროს საქართველო სუვერენიტეტს არ კარგავს, როგორც ეს ვინმეს შეიძლება მოეჩვენოს, არამედ როგორც ხდება დიპლომატიური დიალოგის დროს, კომპრომისებისა და ერთმანეთის მიმართ დათმობის პრინციპით უნდა იხელმძღვანელონ მხარეებმა, რაც საერთაშორისო პრაქტიკაა და არავისთვის გასაკვირი არ უნდა იყოს გარკვეული კომპრომისი, გნებავთ „დიდი კომპრომისი“ საკუთარი მიზნის მისაღწევად. რუსეთის მხარე ამ საკითხს დელიკატურად უყურებს და ეს გამოჩნდა ლეონიდ კალაშნიკოვის განცხადებაში, რომელმაც თქვა, რომ
„მოლაპარაკებების დროს, გათვალისწინებული უნდა იყოს რუსეთისა და საქართველოს ინტერესები, ასევე, აფხაზი და ოსი ხალხის ინტერესები „ოქროს შუალედის“ პრინციპით, რაც დღეისთვის უკვე შესაძლებელია“ - ამ სიტყვებში ყველაფერია ნათქვამი და გამგებმა უნდა გაიგოს.
რაც შეეხება „ხელშეკრულების გაფორმებას“ - ამას დიალოგის შედეგი გვიჩვენებს, ჩვენ წინასწარ არ გვინდა იმ საკითხებზე ვისაუბროთ, რომელნიც ამ ეტაპზე არაა მიზანშეწონილი, ანუ არ გვინდა მოვლენებს წინ გავუსწროთ და არაკეთილმოსურნეებს კრიტიკის საბაბი მივცეთ. რაზე შეთანხმდებიან მხარეები, ამას მოლაპარაკებები გვიჩვენებს. ის კი, რომ საქართველოს კონსტიტუციის 78-ე მუხლი გასაუქმებელია, ამაზე საზოგადოების დიდი ნაწილი კარგა ხანია საუბრობს და მეც ვიტყვი, რომ გასაუქმებელია მუხლები NATO-სა და „ევროკავშირში“ ინტეგრაციასთან დაკავშირებით, ეს არაა დღეს ქართველი ხალხის ინტერესებში და არც იქ ელოდებიან არც საქართველოს, არც მოლდოვას და უკრაინას, რომელიც კონფლიქტისკენ წააქეზეს და დაანგრიეს.
ევროკავშირთანაც იგივე ვითარებაა, გაწევრებისთვის ისეთი პირობები მოითხოვეს, ჩვენი ერისა და ბერისთვის აბსოლუტურად მიუღებელია! იგულისხმება ლიბერალური ფასეულობები, ლგბტ პროპაგანდა და ა.შ. ეს პირობები ბრიუსელის ულტიმატუმია, ჩვენთვის კი პრიორიტეტი პირველ რიგში ეროვნული ტრადიციები, წინაპრების დანატოვარი და ქვეყნის ღირსეული მომავალია.
აქედან გამომდინარე, ის პირობები, რასაც ევროკავშირი გვიყენებს და ითხოვს ჩვენგან, ეს მართლაც, რომ საქართველოს სუვერენიტეტის დაკარგვის გზაა. მეორეს მხრივ, კონსტიტუციაში 78-ე მუხლის არსებობა რომელიმე საერთაშორისო ორგანიზაციაში ინტეგრაციასთან დაკავშირებით - ეს თავის მხრივ, ეწინააღმდეგება საქართველოს კონსტიტუციას.ეს საკითხი შეგიძლიათ კონსტიტუციონალისტებთან დააზუსტოთ და იგივეს დაგიდასტურებენ. პროცედურულად ეს ვერ მოხდება პლებისციტით, ეს უნდა მოწესრიგდეს პარლამენტის საკონსტიტუციო უმრავლესობის გადაწყვეტილებით. უნდა ვივარაუდოთ, რომ ეს არჩევნების შემდეგ მოხდება,როდესაც პარლამენტში იქნება საკმარისი დეპუტატების რაოდენობა. კი ბატონო, საზოგადოება ვადამდელ არჩევნებზეც საუბრობს, და ეს, ჩემი აზრით, სწორია, კონსტიტუციის შეცვლა სხვანაირად ვერ მოხერხდება. მე არ ვგულისხმობ რადიკალურ ოპოზიციას და აგენტურას, ისინი არაადეკვატური და გარედან მართული ჯგუფები არიან. მე ვგულისხმობ საზოგადოების იმ ნაწილს, რომელიც ითხოვს 78-ე მუხლის ამოღებას კონსტიტუციიდან. ამიტომ ეს მოთხოვნაც არსებობს და დროზეა გადასაწყვეტი. ერთმნიშვნელოვნად არავითარი NATO და ევროკავშირი. ჩვენთვის ამ ეტაპზე მთავარია გვქონდეს ნეიტრალიტეტი, ანუ ნეიტრალური საქართველო.
- თქვენ „დიდი კომპრომისები“ ახსენეთ და საქართველოში ყველასთვის მტკივნეული თემაა აფხაზეთი და ცხინვალის რეგიონი. ამასთან დაკავშირებით რა არის მოსალოდნელი დიალოგის დროს, რამდენად რეალურია ტერიტორიული მთლიანობის საკითხების მოგვარება?- დავიწყოთ დიალოგი და ესეც მაშინ გამოჩნდება, მაგრამ კომპრომისების გარეშე ვერ მივაღწევთ აფხაზეთის და ცხინვალის რეგიონის საკითხების მოგვარებას ისე, როგორც ჩვენ გვინდა. ვგულისხმობ იმას, რასაც ჰქვია საქართველოს ისტორიული მიწა-წყალი, ისტორიული ტერიტორიები და ვერ დავბრუნდებით იქ, თუ გარკვეულ კომპრომისებზე არ წავალთ. აქვე უნდა აღმოიფხვრას ის მიზეზები, რამაც გამოიწვია რუსეთსა და საქართველოს შორის დაპირისპირება 2008 წელს.
ჩვენი ქვეყნის საგარეო კურსი ისეთი უნდა იყოს, რომ არ ეწინააღმდეგებოდეს მეზობლების ინტერესებს. როცა გვექნება უსაფრთხოების ხელშეკრულება რუსეთთან, ეს იქნება გარანტია ჩვენი უსაფრთხოებისა. აქვე ხაზგასმით უნდა ვთქვა, რომ დღეს, უკრაინის კონფლიქტის ფონზე, ჩვენს ხელისუფლებას, მშვიდობის მიმართულებით სწორი ნაბიჯები რომ არ გადაედგა და მტკიცედ, პრინციპულად, რომ არ დამდგარიყო, აქ ომი იქნებოდა!!!
- როდის აპირებთ მიმართოთ საქართველოს ხელისუფლებას და როდის დაიწყება პირდაპირი დიალოგი რუსეთთან?- ჩვენ ამ ეტაპზე, როგორც ზემოთ მოგახსენეთ,
საერთო ჯამში უკვე გვაქვს 140 000-მდე ხელმოწერა რუსეთთან პირდაპირი დიალოგის დაწყებასთან დაკავშირებით, ეს ხელმოწერები, კიდევ ერთხელ ვიმეორებ, შეგროვდა რთულ პირობებში, როცა იბლოკებოდა საიტი და ხალხი თავისი რესურსით აგროვებდა რეგიონებში ხელმოწერას და გვიგზავნიდა. ამიტომ, ჩვენს ხელთ არსებული ხელმოწერების რაოდენობას რამდენჯერმე აღემატება დიალოგის მსურველთა რაოდენობა მოსახლეობაში, ანუ ეს ქართველი ხალხის ნებაა. უახლოეს ხანებში ჩვენ, ანუ გაერთიანება „თავისუფალი ტრიბუნის“ წევრები გავმართავთ შემაჯამებელ კონფერენციას და განცხადებით მივმართავთ საქართველოს ხელისუფლებას, დაიწყონ პირდაპირი დიალოგი რუსეთთან. დიდი იმედი გვაქვს, რომ საქართველოს მთავრობა, დასავლეთის წნეხის მიუხედავად გამოძებნის რესურსს საიმისოდ, რომ დაიწყოს დიალოგი.
ამ შემთხვევაში საქართველო მოახერხებს იმ პრობლემების მოგვარებას, რომელიც ბოლო 33 წელია არსებობს ჩვენს დიდ მეზობელთან, რუსეთთან დაკავშირებით. ამას მოჰყვება ეკონომიკური და უსაფრთხოების საკითხების დალაგება ჩვენს სხვა მეზობლებთან. შემდეგ საქართველოს ექნება საშუალება, შეუერთდეს ყველა პერსპექტიულ ფორმატს და მონაწილეობა მივიღოთ რეგიონში არსებულ ყველა ეკონომიკურ პროექტში. ასევე, იქიდან გამომდინარე, რომ საკმაოდ რთულ რეგიონში ვცხოვრობთ, აღნიშნულ ფორმატში მონაწილეობით, დამატებით უსაფრთხოების გარანტიებსაც მივიღებთ. ეს კიდევ ვიმეორებ, ჩვენი ქვეყნის ეროვნულ ინტერესებშია და ყველაფერი უნდა გავაკეთოთ, რომ დიალოგის პროცესი დაიწყოს. მხოლოდ დიალოგი მიგვიყვანს იქამდე, რომ საქართველო აუცილებლად გამთლიანდება და გაბრწყინდება! ესაუბრა
რუსუდან ქობულაძე скачать dle 11.0фильмы бесплатно
